PREPARANDO A EXCURSIÓN

http://www.turismoburela.org/barco_museo.php

https://www.viveiroturismo.gal/historia

EXCURSIÓN A LUGO

Tocou facer unha saída lúdico-didáctica do máis interesante. Fomos toda a mañá do mércores os cursos de 4º e 5º ata Lugo. Alí visitamos o Museo Provincial e fomos atendidos por unha guía que nos explicou moitas cousas superinteresantes. Tamén fixemos unha pequena andaina por un tramo da Muralla e o profe Pedro foinos contando pinceladas da súa historia. Disfrutamos e aprendimos moito.
E de almorzo un rico chocolate con churros.

EXCURSIÓN A POBO AVENTURA

Este venres fomos de excursión os cursos dende 1º ata 4º de primaria. Levounos o autobús pola mañá ata o lugar de Teixeiro a un espazo á beira do río Carregal, afluente do Mandeo, onde uns monitores agardaban por nós para facer varias actividades no entorno da natureza. O día non puido estar millor. Logo de rematar as actividades programadas viñemos xa para As Pontes pero fixemos unha paradiña en Vilalba, na súa praia fluvial. Alí merendamos e estivemos pouco tempo.
Foi unha xornada do máis divertida

 

EXCURSIÓN A PADRÓN E SANTIAGO

Este venres saimos de viaxe todo o alumnado de primaria xunto con nove profes. Logo de preto de dúas horas en autobús chegamos a Padrón onde visitamos as Casa Museo de Rosalía. Gustounos moito poder ver un espazo no que Rosalía, grande escritora da que somos seguidores, pasou os últimos anos da súa vida.

  Como había algo de tempo ata que chegar o tren que nos levaría ata Santiago achegámonos ata o Parque Botánico. Unha preciosidade de entorno. Alí xogamos un rato.

Subimos no tren e algún de nós un pelín nervosos xa que era a 1ª vez.

 

O xantar non puido ser na Alameda xa que chovía nesos momentos e fomos ata un lugar cuberto para comer con tranquilidade .
Sobre das 4 da tarde levounos o autobús ata preto da Catedral. Camiñamos sobre unha hora vendo a fermosura do entorno da Catedral coas súas prazas e edificios maxestuosos e moi ben explicados por Anxel que fixo de guía do grupo de 1º e 2º. Cantas cousas aprendimos. Moitas grazas por ternos acompañado ese ratiño.

 Pasaba algo das 7 da tarde cando chegamos ao cole xa de volta.
Gustounos moito e aprendimos un montón!!

DÍA MUNDIAL DO MEDIO AMBIENTE: A NOSA EXCURSIÓN

Onte, 5 de xuño, conmemorábase esta data medioambiental tan importante. E a nosa mellor manera de celebralo foi organizar a excursión de fin de curso indo á Granxa escola da Casa Grande de Xanceda e ao Museo de Brañas de Valga. Ata alí fomos en dous autobuses o alumnado dende 1º a 4º de primaria con 6 mestras. Tivemos unha xornada cun tempo estupendo que nos permitiu disfrutar tanto da experiencia nesta granxa ecolóxica na que aprendimos tanto e logo pola tarde visitar o Museo de oleiría de Brañas de Valga e facer obradoiros co barro.
Como tantas cousas fixemos case vos deixamos cun collage de fotos que van a amosarvos de mellor forma o que aconteceu esa xornada. Foi intensa pero moi aproveitada.
E xa me diredes se a nosa excursión está relacionada co Medio Ambiente!!!!
Ah!! Non podemos esquecer os agradecementos: ás mestras acompañantes, a maiores das titoras, que foron Blanca e Angeles. Aos conductores dos autobuses e pola parte de 1º un pouco máis a Pablo que botou unha man en toda a visita que fixemos á granxa. E, como non, ás monitoras encantadoras que nos guiaron, amosaron e ensinaron tanto na granxa como no museo. Moitas grazas a todos eles!!!!!!
Nas dúas primeiras composicións podedes ver parte do que fixemos pola mañá na Casa Grande de Xanceda. No último hai unha pequena mostra do que disfrutamos en Brañas de Valga.

granxa xanceda - Movie Maker

granxa xanceda 2 - Movie Maker

museo brañas de valga - Movie Maker

EXCURSIÓN FIN DE CURSO

Este mércores fixemos unha excursión coa clase de 3º e as profes Loli e Angeles que disfrutamos moitísimo. A pesares de que a climatoloxía non acompañou moito, xa que chovía cando saímos, tivemos unha xornada do máis variada. Comezamos facendo parada en Oleiros onde unhas monitoras do CEIDA agardaban por nós para levarnos por un roteiro que resultou ben bonito. Puidemos apreciar a fermosura dunha natureza diversa, aprendimos de árbores, de bichiños, de costumes do rural, da nosa costa galega. Portámonos moi ben xa que andivemos preto de dúas horas disfrutando e aprendendo (e sen cansar case nada!).

 Logo de tomar un refrixerio voltamos ao autobús para ir ata o MUNCYT onde tamén agardaban por nós, e unha monitora foinos guiando e explicando todo o que alí había. Chamounos a atención os robots que nos falaban, todo o relacionado co avión 747 que teñen alí exposto,menudas dimensións!!. Fixemos obradoiros ecolóxicos por grupos. Puidemos xantar nunha sala que teñen preparada no interior do propio museo.

E de sorpresa final tivemos a sorte de que nos deixaran entrar ao estadio de Riazor. Alí tocamos o campo e tiramos varias fotos. 

 
A todas as persoas que estiveron con nós neste día especial para nós MOITAS GRAZAS!!!.

IMOS DE EXCURSIÓN!!!!

Este venres tocou ir de excursión de remate de curso ao 1º e 2º ciclos de primaria. Saímos ás 9 e media en dous buses cara a Arteixo. Alí visitamos as instalación da VOZ e tivemos como guía a Alvaro que durante algo máis dunha hora explicounos moitas cousas interesantes sobre a elaboración dun xornal e outras lerias.
Arredor da unha da tarde estabamos na estación do tren da Coruña onde xantamos e esperamos para coller o tren que nos levaría ata Betanzos. Unha vez alí andivemos un cachiño ata o Parque do Pasatempo que nos engaiolou coa súa fermosura. A pena foi ver o descoidado que estaba todo aquilo. Pero aínda así segue parecéndonos un lugar un tanto "máxico". Para rematar a xornada quixemos facelo no parque de xogos que hai ao pé do Pasatempo.
O bo tempo acompañounos a pesar de ameazar choiva pola mañá. Foi unha xornada ben divertida e acabamos algo cansadiños pero moi ledos coa experiencia vivida.

EXCURSIÓN FIN DE CURSO

Este martes fomos de excursión toda a primaria do noso centro. Saímos ás 9 e cuarto e voltamos ás 8 da tarde. Foi unha xornada na que disfrutamos de varias actividades e que resultou moi completa para todos os que nela participamos.
O noso curso fixemos a viaxe nun microbús que nos levou primeiriño ata Burela onde puidemos ver o Barco Museo. Trátase dun vello barco boniteiro de madeira que agora está atracado no porto para que poda ser visitado por quen queira. Había un rapaz que explicaba de maravilla todo o que alí había. Logo fomos ata San Cibrao para ver e oir o que nos contaron no Museo do Mar. Outra visita ben interesante.
O xantar fixémolo no parque de Cantarrana, en Viveiro. Alí estivemos máis de dúas horas xa que comimos tranquilamente e con bo apetito, e tamén xogamos un bo anaco a varios xogos.
Antes de voltar para As Pontes fomos ata o eucaliptal de Chavín. É este un lugar con moita paz e onde un pode percibir a natureza en estado puro. A verdade é que entre o mar e o río non hai máis que pedir.
Foi unha experiencia ben bonita.

LUGARES SENLLEIROS

Disfrutade con estes vídeos. Son lugares dos que nós xa disfrutamos este martes na excursión da que falamos na outra entrada deste blog.

Eucaliptal de Chavín


Museo do Mar en San Cibrao

EXCURSIÓN DE FIN DE CURSO

Este venres fixemos a última saída deste curso e tamén a máis longa. Fomos os cursos de 1º e 2º xunto coas titoras e Blanca e Marga que nos acompañaron. O día estivo moi bo e aproveitámolo ben.
Saímos cara a Santiago ás 9 e media da mañá e o primeiro foi facer uns obradoiros de consumo cunhas monitoras moi simpáticas que nos ensinaron cousas moi interesantes sobre protección nos diferentes traballos e saúde no traballo.
Logo o autobús levounos ata a Alameda para xantar alí á sombriña das árbores. Ao rematar camiñamos un cachiño ata a Praza do Obradoiro onde estivemos contemplando a fermosura da Catedral.

Outra actividade programada foi a visita á MUPEGA onde un guía moi agradable amosounos as diferentes dependencias. Gustounos moito todo pero sobre todo ver como era unha escola dos nosos antergos e os xogos e xoguetes que había daquelas. A verdade é que nós xa non nos sorprendeu tanto como a nenos de outros coles xa que xogamos coa vantaxe de ter no noso Centro un estupendo Museo Etnográfico.
E como colofón deste día tan xenial fomos en autobús ata o Monte do Gozo. Alí merendamos e xogamos no parque.

FOI O NOSO PARTICULAR ANO XACOBEO!!!!!!!!!!!!!!!