Hoxe, venres 21 de xuño, foi o último día de curso e tamén o día que remata unha etapa de catro anos na que todos e todas aprendimos moitísimo dun xeito ou de outro xa que aínda que vos pareza mentira, eu tamén aprendín moito con vós. Como ben sabedes houbo de todo, bos e regulares momentos, pero posto na balanza a inclinación é total para os momentos positivos.
Isto non é unha despedida, imos seguir véndonos a diario, como sabedes, sempre estarei moi orgullosa de vós e á vosa disposición para o que vos faga falta. Confío plenamente que non me ides a defraudar e que seguiredes sendo alumnos e alumnas exemplares sen esquecer algúns dos conceptos máis importante aprendidos nestes anos, por exemplo: o respeto, a tolerancia, a solidariedade, o cariño co resto das persoas e cara ao traballo sen esquecer o coidado ao Medio Ambiente e o amor á nosa terra e ao noso idioma.
MOITA SORTE!!!!
Quero darvos as grazas polas sorpresas tan fermosas que me fixestes, quedou ben claro que me gustaron e que me emocionaron (sodes un pouco pillabáns!!).
PD: Non quero esquecerme dos pais e nais aos cales lles agradezo profundamente a súa colaboración ao longo destes catro anos.
MOITAS GRAZAS !!!
Un bico para este grupo de 19 exalumnos/as de 4º!!
Disfrutade destas vacacións e deica setembro!!
Hoxe tivemos a oportunidade de visualizar e participar dunhas actividades que, levadas á práctica, fan que o noso día a día sexa máis ecolóxico. Achegouse ata o centro un monitor de Endesa-Educa que nos fixo unha introducción ao concepto de enerxía baseándose fundamentalmente nas enerxías renovables: eólica, solar e hidráulica. Puidemos experimentar cun aeroxerador, unha bicicleta con dinamo, una miniturbina, unha placa fotovoltaica, xoguetes solares, colector solar (para quentar auga nas casas), cociña solar e paneis explicativos sobre o aforro de enerxía que cada un de nós pode practicar individualmente.
Os cursos que participaron desta actividade foron 2º, 3º e 4º de primaria.
Estivo moi entretida e didáctica. Agradecementos a Noel, monitor que explicou toda esta actividade.
No día de hoxe quixemos adiantarnos ao día Mundial do Medio Ambiente e fixemos unha saída que nos levou ata as Medoñas dos Airíos e a Fonte das Buliqueiras. Fomos os cursos de 2º, 3º e 4º de primaria. Esta actividade vense facendo dende hai cinco anos organizado pola AMA e Departamento de EF de primaria.
O día non puido estar mellor, cun sol de xustiza. Primeiro paramos ao pé dunha medoña, das poucas que quedan no noso concello. Aprendimos que son lugares funerarios datados de 6000 anos antes de cristo.
Logo andivemos un treito ata a fonte ferruxinosa da que tanto escoitáramos falar. A paraxe resulta ben fermosa, cunha natureza impresionante. Alí atopámonos cunhas escaleiras nas que nos sentamos para escoitar unha pequena explicación por parte das profes Loli e Fina.
Merendamos á sombriña e puidemos beber da propia fonte e levar auga nas botellas que traíamos.
Coido que disfrutamos e aprendimos moito con esta experiencia.
