SORPRESA COS NENOS E NENAS DE SOMOZAS

Hai unha semana tivemos a grata sorpresa de que a mestra Olalla, moi boa amiga nosa e que agora dá clases no cole veciño das Somozas, tiña que darnos algo. Tratábase dun testo con cenorias que plantaran na aula e que non tiñan un espazo onde facer o transplante. Entón pensaron en nós e xunto cunha carta moi chula escrita por eles contaban que querían que nós as plantáramos no noso horto.
Quedamos moi agradecidos e contestámoslles con outra carta e unha nogueira das que nós sementamos no outono. Seica a van coidar e para o vindeiro ano plantarán no seu patio.
Xa vos contaremos como van a seguir estas boas relacións que iniciamos desta maneira tan bonita.
E tamén o que pasa con esas cenorias que plantamos no noso horto.

DÍA DO LIBRO

Sempre é necesaria, importante e formativa a lectura de libros, revistas, xornais....
Esta semana estivemos facendo actividades relacionadas con esta conmemoración. A lectura diaria xa é algo que está instalado na programación diaria de aula. Por veces na biblioteca e outras na propia clase. Compañeiras que levan o departamento de biblioteca traballaron conxuntamente con alumnos para conseguir un mural ben chulo sobre unha escena do Quijote...tamén a porta da nosa biblio quedou chulísima semellando a entrada a un muíño de vento dos que saen na obra de Cervantes. Parabéns polo traballo final.
Igualmente elaboramos uns marcapáxinas e uns colgantes en forma de libro imaxinando que sendo un libro o que seríamos...

 

 ESTA IMXE QUEDA AQUÍ POLO SIGNIFICADO QUE TEN PARA MIN A LECTURA DUN LIBRO: UN LIBRO É UNHA PLANTA...CADA VEZ QUE LEMOS NACEMOS E MEDRAMOS AO MESMO TEMPO

DÍA DA TERRA

HISTORIA DESTA DATA

As orixes da celebración remóntanse ó nacemento do movemento ecoloxista de finais da década de 1960 e comezos da seguinte. O primeiro que aparentemente concibiu a idea dunha festa denominada Día da Terra foi o asesor do presidente John F. Kennedy, Frederick G. Dutton, pero John McConnell tamén aparece xeralmente nas crónicas dos primeiros tempos como introdutor da idea dunha festa de carácter global nunha conferencia da Unesco celebrada en 1969. Ese mesmo ano o senador por Wisconsin Gaylord Nelson, preocupado pola degradación ambiental, animaría os estudantes a unírense na que sería a primeira protesta ecoloxista de importancia nacional nos Estados Unidos co obxectivo de intentar establecer a problemática ambiental na axenda política americana. Tería lugar o 22 de abril do ano seguinte cun éxito enorme que conseguiu mobilizar uns vinte millóns de americanos en toda a nación, dúas mil universidades, dez mil escolas primarias e secundarias e numerosas organizacións. Foi a primeira vez que se celebraba realmente en América o Día da Terra. Como consecuencia desta mobilización nacional en torno a un día de reivindicación ecoloxista, o senador Nelson puido abandeirar a creación da Axencia de Protección do Ambiente dos Estados Unidos (EPA) e conseguir que se aprobase lexislación ambiental duradeira, coma a Lei do Aire Limpo, e leis para protexer a auga potable (Lei da Auga Limpa), as especies animais en perigo de extinción (Lei das Especies en Perigo), e os mares. A data do 22 de abril segue sendo a celebración máis popular do Día da Terra nos Estados Unidos e fíxose tamén popular noutros moitos países.

DÍA DA TERRA

Unha data tan importante a conmemorar non pasa desapercibida no noso centro. Varias foron as actividades que fixemos ao longo da semana. Entre outras están a de plantar no noso horto e invernadoiro productos de tempada como patacas, millo, cenorias, pementos, leitugas e tomates . Comentar que as plantiñas de cenoria que plantamos son un agasallo que nos fixeron os nenos e nenas do cole veciño das Somozas, xunto coa súa profe Olalla. 

 Tamén elaboramos uns colgantes para adornar a nosa árbore de madeira. Tratábase de corear debuxos en forma de Terra con diferentes mensaxes alusivas ao coidado do noso Planeta e que logo de recortar pegamos nun soporte dun DVd xa fóra de uso, reutilizando de novo este obxecto. Tamén nesta semanas estivemos traballando a reciclaxe nas aulas e nas casas elaborando composicións ben fermosas. 

VISITA AO NOSO MUSEO

Nestas últimas semanas puidemos disfrutar das explicacións de José Mª polo entramado do museo etnográfico do noso Centro. Démonos conta de que a pesares de estar convivindo con todas esas pezas descoñecíamos moitas das cousas que nestas tres sesións aprendimos. Moitas grazas José Mª.

VISITA DE HELENA E SUSO...DÍA INTERNACIONAL DO LIBRO INFANTIL

Este venres tivemos unha visita no cole para non esquecer. Os nosos amigos Helena Villar Janeiro e Suso Rábade Paredes achegáronse ata a nosa vila e unha das paradas que fixeron pola mañá foi ata o noso centro. Aparte de recibilos como se merecen aproveitamos que, sendo este sábado o Día Internacional do libro infantil , departiran con nenos e nenas de varios cursos de primaria a última hora da mañá na nosa biblioteca. Falaron dalgún dos seus libros e de varias anécdotas da súa vida. Tamén aproveitamos para facerlles algunhas preguntas e para que os nenos e nenas de 3º recitaran de memoria un poema dos seu libro "As señoras cousas". Encantounos compartir con estes dous grandes escritores e mellores persoas uns momentos verdadeiramente máxicos. Voltade sempre que queirades....aquí tedes xente miúda e non tanto que vos quere de verdade.
Moitas grazas por estar...e biquiños grandes de todos e todas.